Leave a Comment / News / By GIFT Real Estate
ጊፍት ሪል እስቴት ከአዲስ አበባ ከተማ አስተዳደር ጋር በመተባበር በዝቅተኛ የኑሮ ደረጃ ለሚገኙ ነዋሪዎች ያስገነባውን የመኖሪያ ህንፃ አስርክቧል፡፡
ቤቶቹ ለ30 አቅመ ደካሞች፣ የሀገር ባለውለታዎች እና አካል ጉዳተኞች እንዲውል ተደርጓል።
በቦሌ ክፍለ ከተማ ወረዳ 4 የተገነባው ይህ ዘመናዊ ባለ 4 ወለል የጋራ መኖሪያ ህንፃ 10 የስቱዲዮ፣ 5 ባለ 2 መኝታ እና 15 ባለ አንድ መኝታ ቤቶችን አካትቷል።
የመኖሪያ ቤት ቁልፎቹን ለነዋሪዎች ያስረከቡት የአዲስ አበባ ከተማ አስተዳደር ከንቲባ አዳነች አቤቤ፤ ከተማ አስተዳደሩ ከግል አልሚዎች ጋር በመተባበር የነዋሪዎችን የመኖሪያ ቤት ጥያቄ ለመመለስ እየሰራ መሆኑን ተናግረዋል።
ከለውጡ ወዲህ 35 ሺህ ያህል ቤቶችን ለነዋሪዎች ማስረከቡን የጠቀሱት ከንቲባዋ፤ ከተማ አስተዳደሩ በተለያዩ ሰው ተኮር ፕሮጀክቶች ነዋሪዎችን ተጠቃሚ ለማድረግ እየሰራ እንደሚገኝም አስታውቀዋል።
ህንፃውን ያስገነባው ጊፍት ሪል እስቴት ባለቤት እና ስራ አስኪያጅ አቶ ገብረየሱስ ኢጋታ በበኩላቸው፤ ከተማ አስተዳደሩ ባደረገላቸው ጥሪ በ3 ወራት ውስጥ ህንፃውን አጠናቆ ማስረከቡን ተናግረዋል።
ሪል እስቴቱ ከዚህ ቀደምም በለሚ ኩራ ክፍለ ከተማ ባለ5 ወለል የመኖሪያ ህንፃ ገንብቶ ማስረከቡን አስታውሰው፤ የማህበራዊ ተሳትፎዎች ላይ ባለሀብቶች እንዲሳተፉ ጥሪ አቅርበዋል።
በቁልፍ ርክክብ ስነስርዓቱ ላይ ለግንባታው አስተዋጽኦ ያበረከቱ አካላት እውቅና ተሰጥቷቸዋል።
